Bideberri mankomunitateak autodefentsa feminista tailerra iragarri du azaroaren 10erako eta 11rako, Elgetan. Tailerra aurrera ateratzeko hamar parte hartzaile behar dira gutxienez, eta oraingoz lau dira izena eman duten emakumeak.
Indarkeria Matxistaren Kontrako Egunaren bueltan antolatutako tailerra da, eta doan da. Bi saio izango dira eta ludotekan egingo dituzte, 09:30etik 11:00etara.
Emagin taldeko Rebeka Maestrok gidatuko du tailerra. "Egunerokotasunean emakumeok eraso eta diskriminazio egoera ezberdinak jasaten ditugu, eta horien aurrean indartu eta txiki egin ez gaitezen tresnak landuko ditugu", azaldu du. Hala, emakumeen jabekuntzarako eta berdintasunerako saioak izango dira. Interesatuek udaletxean eman behar dute izena lehenbailehen.