Iluna eta luzea izan ohi da Arimen Gaua, eta hemen da berriz. Azken urteetan moduan seigarren mailako neska-mutikoek arima herratu ugari protagonista dituen istorioa eskainiko dute. Berrikuntzak iragarri dituzte, batez ere amaieran. "19:30ean abiatuko gara hilerriko eskaileretatik eta beste hiru geldialdi egingo ditugu herrian: Maialde hotelean, elizpean eta plazan", azaldu du aktore lanak egingo dituzten neska-mutikoak gidatzen diharduen Nerea Villak.
Hamar neska-mutiko dira antzezlan ibiltarian parte hartuko dutenak, eta istorioa sinplifikatuta eta amaiera berriarekin datorrela aurreratu du Villak. Horrekin batera ibilbideak geldialdi gutxiago izango dituela esan du. "Amaieran, petardo-traka izango da plazan eta urtero moduan gozokiak banatuko ditugu".
Gomendioa da etxetik linterna hartuta bertaratzeko.
Kalabaza gutxi aurten
Gaur, martitzena, egin dute Herri Eskolako ganbaran kalabazak husteko tailerra, 18:00etan. Bihar erabiliko dira kalabaza horiek kale bazter ilunak argitzeko. Zaila izan omen da aurten kalabazak aurkitzea. Neska-mutikoei koilara bana eramateko eskatu diete, eta helduei labana bana.