Literatura ginkanarekin emango diote hasiera urriaren 24an ospatzen den Liburutegiaren Egunaren bueltan antolatutako ekintza sortari. Gaur, hilak 15, kaleratuko du liburutegiak ginkanako lehenengo proba. Hainbat izango dira hilaren 24ra bitartean, eta puntu gehien lortzen dituen parte-hartzaileak liburu dendan erabiltzeko 60 euroko erosketa-bonua irabaziko du.
Ginkana liburutegiko erabiltzaile diren eta 2010. urtetik aurrera jaiotako elgetar guztiei dago zabalik. Lau proba izango dira eta liburutegian, liburutegiko blogean zein liburutegiko sare sozialetan egongo dira eskuragarri.
'Yoga ipuinak' saioa barikuan
Berria izango da aurten 5 urtetik gorako neska-mutikoei zuzendutako Yoga ipuinak izeneko saioa. Geaxi Ezpeletak eta Alazne Azkaratek egingo dute. Batak ipuinak kontatuko ditu eta besteak yoga ariketak gidatuko ditu. Urriaren 19an egingo dute, 17:00etan.