Martxan da Gipuzkoako hiru txirlo txapelketa. Zapatuan jokatu zuten bigarren jardunaldia Eibarko Asola Berri bolatokian, eta maiatzaren 26an izango da bederatzigarrena eta azkena Azkoitiko Floreagan. Sebastian Arantzabal bolari elgetarrak adierazi du aurten bi talde dituela Elgetak txapelketan, eta zortzi bat lagunek dihardutela bertan. Arantzabalekin batera dira taldean Geaxi Ezpeleta zein Xabier Ortuzar, eta Markina aldetik etorri diren bolari berriak aipatu ditu. "Jende gaztea da. Bi taldetan banatuta zortzi edo bederatzi bat lagun izango gara", esan du.
Lehendakari Saria egun bakarrean jokatzen da orain, eta Gipuzkoako txapelketako lehen 64 sailkatuek jokatzen dute. Txapelketa amaitu eta hurrengo zapatuan izango da aurten, ekainaren 2an. "Egun horretan egingo dira baita ere bazkaria, omenaldia eta Gipuzkoako txapelketako sari banaketa ekitaldia", azaldu du elgetarrak.