Aste berezia izaten ari da honakoa Elgetako Herri Eskolan. Astelehenean eman zioten hasiera kultura asteari eta ikasleak ikasgelatik ikasgelara ibili dira ipuin kontalari. Jokoak eta jolasak ere egin dituzte. Hain zuzen ere, bihar egingo dute ginkanaren sari banaketa.
Eguneko zentroan ere izan dira eskolako hainbat ikasle, taldeka. Kantuan egin dute bertako erabiltzaileendako. Txirula ere jo dute nagusien aurrean.
Gaurko iragarrita zeuden kaleko ekintzak, tamalez, bertan behera gelditu dira. Aurreko egunetan egindako eguraldia izan da arrazoia.
Ikasleak zuhaitz landaketak egitekoak ziren: txikienek eskola ondoko patioan sartu behar zituzten zuhaitzak eta LH 1 eta 2-koak Egoarbitzan. Hirugarren mailatik gorakoek, berriz, irteera zuten Gomiztegira. Elurra dagoela-eta deia jaso zuten atzo ikastetxean esanez hobeto zela irteera atzeratzea. Hala, aurrerago joango dira elgetarrak Arantzazuko baserri eskolara.
Zuhaitz landaketa
Haur Hezkuntzako ikasleek azkenean bi zuhaitz landatu dituzte gaur goizean eskolako ortuko atzeko aldapan. Kakiondo bat eta okaran bat izan dira. Ikasleen begiradapean haziko dira.
