Alerta laranja aktibatu du Segurtasun sailak elurragatik. Alerta, biharko 12:00etan kenduko dute, abisu horira pasatuko delarik. 18:00ak aldera bota du mara-mara Elgetan eta orduan joan da elurra bazterrak zuritzen.
Gaur gauean elur maila 200 metrotan kokatuko da eta bihar goizeko lehen orduan 100-300 metro artean egongo da, iragarpenen arabera.
Arretaz gidatzeko gomendioa egin dute Segurtasun Sailetik. Kontuz gidatu behar da Elgeta inguruko mendateetan. Udalak ere aktibatuta dauka elurraren protokoloa.
Mendateen egoera kontsultatzeko trafiko.eus.
Zazpi elurte aurten
Abenduari hasiera emateko bota zuen lehenengo elurtea Elgetan eta herria zuri-zuri zegoela ospatu zuten herritarrek Euskararen Nazioarteko Eguna. Gabonak osteko eskolaratzea eta Inauteriak ere zuri joan dira aurten. Jarraian, negu honetako elurteak:
- Abenduak 1-2
- Urtarrilak 7
- Urtarrilak 11
- Otsailak 2
- Otsailak 7-8-9
- Otsailak 28
- Martxoak 19
