Gaztetxearen itxiera jaia egingo dute zapatuan Elgetan, eta horrekin batera gaztetxearen 22. urteurrena ospatuko dute. Gazte Asanbladako kideek soinuarekin alaitutako txikiteoa iragarri dute 13:00etarako. Taldea gaztetxetik abiatuko da eta tabernaz taberna ibiliko dira bazkaltzeko ordua iritsi bitartean.
Bazkaria 15:00etan izango da. Kantu bazkaria izango da eta menua da pasta entsalada, oilaskoa, sagardoa, ardoa, postrea eta ogia. Prezioa da 10 euro eta izen-ematea Haizean egin behar da martxoaren 14a aurretik.
Jai giroari jarraipena emateko Elektro Txufla kaleko bandak hartuko du lekukoa 19:00etan.
Gazte Asanbladatik jakinarazi dute 22 urteotan pilatutako argazkiekin erakusketa egingo dutela. Gaztetxean izango da ikusgai zapatuan.
