"Azken neurketen arabera euskararen ezagutza Elgetan %84,3 da eta erabilera, berriz, %61,8. Ezagutzaren eta erabileraren arteko desorekak kezkatuta eta herrian euskararen erabilera indartzeko asmoarekin 2018an hainbat ekimen eramango ditugu aurrera", adierazi du Goibeko Euskaltzaleen Topagunetik.
Ekintza horiek Euskaraldia, 11 egun euskaraz ekimenaren barruan kokatuko dituztela jakinarazi dute. "Urtearen erdialdetik aurrera gura ditugu ekintzak egin, eta dagoeneko lotu ditugu Kike Amonarrizen hitzaldia, Xabi Paiaren hitzaldia, zirkua euskaraz, Euskaltzaleen Eguna eta azaroaren 23tik abenduaren 3ra euskaraz bizitzeko Euskal Herrian herriz herri aurrera eramango den Euskaraldia. Ikasiko ditugu bi berba berri: ahobizi eta belarriprest".
Deia herriko eragileei eta elkarteei
Euskaraldiarekin lotutako egitaraua aberasteko Goibeko herriko eragileekin eta elkarteekin harremanetan da nork bere aletxoa ipintzeko ekimen honen baitan. "Elgetako erakunde ezberdinekin —erretiratuen elkartea, mendizaleen elkartea, Udala, bestelako elkarteak...– egongo gara eta aberastuko da proposamen ireki hau", esan dute.