Boluntarioak eskatu dituzte Erdi Aroko Elgeta birsortzeko

Bisita gidatu berezia egin gura dute otsailaren 11n eta deialdia egin dute egitasmoak aurrera egin dezan.

Kale bakarreko herria zen Elgeta Erdi Aroan, eta hainbat lekutatik jasotako datuekin birsortu gura dute. "Antzezlan txikien bitartez erakutsi gura dugu zaldunen, inkisidoreen eta emaginen —sorginen— Elgeta", adierazi du ahalegin horretan diharduen Nerea Villak. "Herritar guztiei, baina batez ere herriko neska-mutikoei erakutsi nahi diegu antzinako Elgeta zelakoa zen". Bisita gidatua antolatu gura dute eta Inauteri-domekan egitea da asmoa, otsailaren 11n. Ordu eta erdi inguruko iraupena izango du saioak.

Herria girotzeko eta antzezlan labur horietan parte hartzeko boluntarioak eskatu dituzte. Interesatuek udaletxean eman behar dute izena urtarrilaren 19rako. Taldea osatzen bada egingo du aurrera egitasmoak. "Antzerkiaren mundua gustuko baduzu edo probatu nahi baduzu lagundu bisita gidatu honetan. Paper txikiak dira eta zure lanaren bitartez Elgeta Erdi Aroan nolakoa zen erakusten lagunduko duzu", esan du Villak.

ALBISTEAK MUGIKORREAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.