Domekan herritarrak izango dira epaile pintxo lehiaketako Publikoaren Saria erabakitzeko

Larraitz Zeberio Lekuona 2017ko aza. 15a, 13:24

El Rincon de Lola tabernako Maria Cobok jantzi zuen txapela domekan. Aste bukaera honetan taberna bakoitzak lehiaketara aurkeztutako pintxo onena emango du euro bateko prezioan eta Publikoaren Saria egongo da jokoan. Gainera, argazki lehiaketa azkarra eta Elgeta kantuan ekimenak antolatu ditu Udalak.

Bigarren urtez irabazi du Elgetako Pintxo Lehiaketa El Rincon de Lola tabernako Maria Cobok. Epaimahaiaren iritziz lehenengo pintxo domekan aurkeztutako Lola pil pil izeneko bakailao pintxoa izan da lehiaketako onena.

Haizeak, Bolatoki tabernak, Maialde landetxeak eta El Rincon de Lolak hartu dute parte, aurten, lehiaketan eta bina pintxo aurkeztu dituzte. Epaimahaiko kide Jon Irazabalek azaldu du hiru ezaugarri baloratu dituztela: "Zaporea, itxura eta elaboraziorako hartuta lana baloratzeko eskatu digute eta hiruren baturak eman du emaitza". Irazabalek gaineratu du pintxo denak izan direla onak. "Ez da pintxo txarrik egon. Tabernariek lana hartu dute eta irudimen handia erakutsi dute. Denek. Zoriontzekoa da eduki duten kontu guztia".

Maria Cobok, nola ez, pozik jantzi du irabazlearen txapela. "Oso oso pozik nago, benetan. Bakailaoarekin egindako pintxoarekin irabazi dugu. Lan handia darama. Nahiz eta herri txikia izan eta lehiaketak lau parte-hartzaile izan landutako pintxoa eskaini nahi genuen eta uste dut lortu dugula".

Domekan, herritarrak epaile

Elgetako X. Pintxo Lehiaketako hirugarren eta azken domeka izango da honakoa. Bezeroek txapelketa irabazi duen Lola pil pil izeneko pintxoa berriz dastatzeko aukera izango dute, eta horrekin batera taberna bakoitzak aurkeztutako pintxorik onena. Prezioa, beti ere, euro bat izango da.

Dastatu bakarrik ez; izan ere, herritarrek pintxoak baloratzeko aukera ere izango dute, eta botoen baturak emango du Publikoaren Saria. Botoa emateko hiru bide izango dira aurten: tabernetan ipinitako papertxoen bitartez, Hirix plataforma digital berrian sortutako galdetegiaren bitartez eta selfie lehiaketaren bidez. Hiru kasuetan 30 euroko erosketa-bonua zozketatuko du Udalak parte hartzaileen artean.

Argazki lehiaketa eta Elgeta kantuan

Azken pintxo domeka girotzeko argazki lehiaketa azkarra –12:00etan plazan– eta Elgeta kantuan ekimena –13:00etan plazan– antolatu ditu Udalak.

ALBISTEAK ESKUKO TELEFONOAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.

ASTEBURUETAKO BULETINA

Zure posta elektronikoan asteburuko albiste nabarmenekin osatutako mezua jasoko duzu. Harpidetu zaitez debalde hemen.


Harpidetza aukera guztiak