Urtero moduan urriko azken astelehenean Gernikan egiten duten azoka egunera egingo dute txangoa Elgetako erretiratuek. Autobusa antolatuko dute eta gaur, urriak 11 zabalduko dute izen-ematea. Ozkarbi elkartean izango dira zuzendaritza batzordeko ordezkariak 11:00ettik 12:00etara.
Hilaren 30erako egitaraua da goizean azoka ikustea eta Lekeitioko Egaña jatetxean bazkaltzea. Taldea 09:15ean abiatuko da autobusez Ozkarbi elkartetik.
Podologoa eta gaztaina-erre jana
Xalbadorpe elkartetik aurreratu dute urriko podologia kontsulta hilaren 19an, eguena, izango dela. Interesatuek txanda hartu behar dute aurrez. Deitu zenbaki honetara: 943 76 80 77 (Nati).
Horrekin batera jakinarazi dute urteroko gaztaina-erre jana azaroaren 3an egingo dutela. Ozkarbi elkartean elkartuko dira, 18:00etan. Bazkide guztiak daude gonbidatuta.