Abuztuko etenaldiaren ostean Kantsatzeke mendi taldeko kideak itzuli dira betiko martxara eta domekarako antolatu dute ikasturte berriko lehenengo irteera. "Unanutik abiatu eta Beriaingo tontorretik pasa ondoren Euskal Herriko erdigune geografikoa bisitatuko dugu", adierazi dute. Puntu hori Nafarroan dago, Andia mendilerroan, Beriain edo San Donato bezala ezaguna den tontorretik ekialdera. Olibesario izenez ezaguna, 1.236 metrora dago. Bospasei orduko ibilaldia egingo dute domekan eta taldea 08:00etan abiatuko da autoetan herriko plazatik.
Gazteekin Orkatzategira
Hurrengo domekarako familiendako irteera antolatu dute. Orkatzategi eta Aitzulo proposatu dituzte. "Etxetik gertu dugun txoko zoragarria da. Aitzulo ezagunagoa da, baina Orkatzategi ez eta izugarrizko bistak daude", adierazi du irteera horretako arduradun Ibai Etxanizek. Ibilbide zirkularra egingo dute: bederatzi bat kilometro eta gehienez ere 600 metroko desnibel positiboarekin.
Kantsatzekek udaberrian egin zuen familiendako lehen irteera eta 45 bat lagunek hartu zuten parte. "Oso gustura bueltatu ginen. Umeen artean mendizaletasuna bultzatzeko aitzakia ona da guraso asko ere mendira gerturatzeko eta etxe inguruan dauzkagun paisaia zoragarriak ezagutzeko". Izenemateak zabalik daude.
