Urtetik urtera gutxitzen doa uda sasoian haur sahararrak harreran hartzeko prest dagoen familia kopurua. Hala, aterpetxe bat zabaltzeko proiektua du esku artean Maiatzak 20 Saharar Herriaren Lagunen elkarteak. Tolosan zabalduko dute. "Dagoeneko gauza asko bildu ditugu baina zerrendan jartzen ditugun gauzak falta zaizkigu oraindik", adierazi dute.
Elgetako Udalak bat egin du abian jarritako bilketa kanpainarekin eta herritarrek udaletxean bertan utz ditzakete produktuak.
Eskatutako produktuak
Elikagaiak eta higiene produktuak behar dituzte aterpetxea hornitzeko. Jakiei dagokienean eskatu dituzte kakao hautsa, zerealak, mermelada, gailetak, esnea, zukuak, kakao krema, txokolateak, tomate frijitua, irina, zainzuriak, olibak, artoa, ilarrak, eta piperrak latan.
Higiene produktuei dagokienean komuneko papera, arropa garbitzeko xaboia, harrikoa egiteko xaboia, orraziak, gomak eta zintak eskatu dituzte. Mahai-jokoak ere ongi etorriak izango dira.
Bilketa udaletxean
Elgetarrei dei egin diete produktuen bilketa kanpainarako. Ekarpenak Elgetako udaletxean egin daitezke ekainaren 16tik 28ra bitartean, 08:00etatik 13:00etara.