Horrekin batera izandako lapurretan apurtutako patioko atea berritzeko 175 euro ipiniko ditu Udalak. Aseguru etxeak ordainduko du atea, baina ezaugarri berdinetako atea ipintzeko. Udalak erabaki du ate sendoagoa ipintzea eta prezioa beste bat izanik 175 euro ordainduko ditu Udalak kopurura heltzeko. Gainera, baratze parkearen mantenurako 2.200 euroko lerroa finkatzeko erabakia hartu dute Udaletik, eta Magia Mostra finantzatzeko Pikuperi 2.500 euro ordaintzea: 1.250 euro diru-laguntza kontzeptuan eta 1.250 euro bestelako gastuak ordaintzeko. Puntu honetan oposizioak esan zuen ez dela egokia zerbitzu bat ematen duen enpresa pribatu bati diru-laguntza bat ematea. Faktura bidez egin beharko litzatekeela ordainketa guztia.
Bestelako jakinarazpenak
Alkatearen opor egunekin lotuta uztailaren 8tik 16ra Janire Lazkanok hartuko ditu alkatetza ardurak. Udalak, gainera, finkatu du 2017ko festa egun ofiziala: ekainaren 30a izango da.
Udalbatzak, bestalde, herritarrei ikastaroak eskaintzeko Cebank elkartearekin aurretik sinatuta zegoen hitzarmena luzatzea erabaki du.
Mandela Arauekin bat
EH Bilduk proposatuta Elgetako udalbatzak aho batez egin du bat Nazio Batuek onetsitako Presoak Tratatzeko Oinarrizko Mandela Arauekin. Arautegi horrek, besteak beste, muturreko isolamenduaren erabilera sistematikoa arbuiatzen du. "Eskatzen dugu euskal presoei arau hau aplikatzea", esan du Iraitz Lazkano alkateak. Gu Geu Elgetako Mikel Larreak esan du: "Giza eskubideen errespetuan beste pauso bat ematea da. Ea behingoz, egunen batean, bateren batek zerbait mugitzen duen".