Luze jo zuen Elgetan ere San Juan bezperak. 20:00etan eman zioten hasiera Gauargi taldearen erromeriari. Eguraldi aldaketa tarteko udal pilotalekuan egin zuten saioa, eta gustura egin zuten dantzan neska-mutikoek. Afari-pasada guraso elkartearen kontu izan zen; izan ere ogitartekoak banatu zituzten urtero legez.
Sua ilundutakoan
Eguzkia sartu eta argitasuna jaitsi zenean eman zioten su Elgetan herriko neska-mutikoek aurreko asteetan prestatutako piloari. Laster hartu zuen indarra suak, eta handi egin zen berehala. Horregatik, umeek laster egin zituzten beste hiru su txiki aldamenean. Nork bere ausardiaren arabera salto gehiago edo gutxiago egin zituzten. Zenbait heldu ere animatu ziren. Sua oraindik piztuta zegoela suziriak bota zituen Bolatoki tabernako Jose Monterrosok. Txaloekin hartu zituzten bertaratutakoek.
Bolatoki ondokoan izan zen herritar gehien elkartu zituen sua, baina egon ziren gehiago ere, tartean Larrabilzearrako zenbait etxetan.
Joan da San Juan bezpera, eta Elgetan ere sutara bota dituzte txar guztiak. Onak barrura.
