Badira urte batzuk Herri Eskolako danborradak San Sebastian Eguneko piezak eskaintzen dizkiela Elgetako eta Uberako San Sebastian kofradiako Nobleei. Aurten ere eguerdian egin dute hitzordua elizpean, eta guraso eta ikusle askoren aurrean hiru pieza jo dituzte gazteek Julen Garmendia danbor nagusiaren gidaritzapean.
24 Noble aurten
Urtean behin, San Sebastian Egunarekin, egiten dute ekitaldia San Sebastian kofradiako Elgetako eta Uberako Nobleek. Parrokian meza entzun, sakristian urteroko ekitaldia egiten eta bazkaria egiten dituzte. Errege Katolikoen garaitik datorren instituzioa da Nobleen Kofradia. Aurten, 24 Noble elkartu dira.
Eskolako danborrada
Eskolako danborradari dagokionean Haur Hezkuntzako neska-mutikoek osatzen dute seigarren mailako ikasleen laguntzarekin. Entsegu ugari egin dituzte aurreko asteotan, eta hiru pieza eskaini dituzte elizpean.
Danbor nagusia, aurten, Julen Garmendia izan da.
Arratsaldean, 15:30ean, egingo du bigarren eta azken emanaldia eskolako danborradak frontoi zaharrean.
