Hurbildu eta ezagutu lelopean ate irekiak antolatu dituzte Elgetako udal ludotekan gaurko eta hilaren 11rako eta 18rako. Zerbitzuak ikasturtearen hasierarekin batera zabaldu zituen ateak, eta arduradunek egitarau berezia gertatu dute abendurako, tartean ate irekien jardunaldiak. Hala, Elgetako 11 urtera arteko neska-mutikoek sarrera librea izango dute abenduko hiru egun horietan.
Gaur, hilak 4, jolas librea eta eskulan tailerra egingo dituzte. Abenduaren 11rako mimika jolasak eta Gabonetako eskulan tailerra iragarri dituzte, eta abenduaren 18rako ginkana eta pelikula baten proiekzioa.
Udal ludoteka Torrealdean dago. Ate irekiak izango dira adierazitako egunetan, 17:00etatik 19:00etara.