Estatu mailako Sky Series zirkuituko azken lasterketa irabazita –Montsenyko mendi maratoia–, zirkuitua eskuratu du Kortazarrek. Zirkuitua osatzen duten lasterketa guztiak irabazi ditu elgetarrak –bat izan ezik, ez zuen parte hartu–. Zirkuituko azken probara lider iritsi da Kortazar eta lider amaitu du.
2.800 metroko desnibela
45,5 kilometroko lasterketa izan da Katalunian jokatu dutena, eta 2.800 metroko desnibel positiboa izan du. Lasterketa bizkorra izan da, korrika asko egitekoa.
Gaurko egunez, Behobia lasterketa egin izan du Kortazarrek –2012an irabazi egin zuen–, baina gaurkoan Montsenyko proba egitea nahiago izan du.
Patagonian amaituko du denboraldia
Datorren zapatuan amaituko du denboraldia Kortazarrek: Argentinan, Patagonian jokatuko duen mendi maratoiarekin. Ondoren, Aconcagua igotzeko asmoa dauka.
