Marcelo Usabiaga familia eta lagun giroan erraustuko dute Donostian, eta PCE-EPK alderdiak haren omenezko ekitaldia egingo du Frankismoaren Biktimen aldeko monumentuan, Donostian, 14:00etan.
Anaia fusilatuta
17 urterekin hasi zuen ibilbide politikoa gudari irundarrak Alderdi Komunistan, 1933. urtean. Errepublikaren defendatzaile irmoa izan zen, hainbat borrokalditan jardundakoa. Anaia Bernardo Usabiaga frankistek fusilatu zuten eta Marcelo Usabiagak berak 20 urte eman zituen diktaduraren kartzelatan, hainbat kartzelatan.
Klandestinitatean ere borrokan
Ihes eginda ere ibili zen, Frantziara ihes egin ere. Hala ere, klandestinitatean segitu zuen borrokan eta berriro ere atxilotu egin zuten. Hendaian egokitutako kontzentrazio eremu batera eraman zuten. Eta hala ere, handik irtendakoan borrokan segitu zuen. Berriro atxilotu zuten eta Burgosko kartzelan 14 urte egin zituen. 1960an irten zen bertatik.
Elgetan
Aurtengo apirilean Elgetan Intxortako erresistenteei egindako omenaldira bertaratu zen Debagoienera, Irundik. Gainontzeko omenduek bezala, Iñigo Arregi eskulturagile arrasatearraren oroigarria jaso zuen eta Elgetako plazan elkartu zirenen omenaldi beroa. Omenaldian bertan parte hartzeaz gainera, milizianoendako antolatutako bazkarian parte hartzeko animoa ere izan zuen ia 100 urte zituen gizonak.