EH Bilduren udal gobernuak hamabi batzorde izango ditu. "Planteamendua da batzorde gehiago eta laburragoak egitea", esan zuen Iraitz Lazkano alkateak. Oposizioan dagoen Gu Geu Elgetaren proposamena zen antzerako gaiak elkartu eta sei batzorde osatzea. "Praktikoagoa eta herriaren errealitateari egokituagoa iruditzen zaigu", esan zuen Mikel Larrea bozeramaileak. Lazkanok azaldu zuen egokiagoa ikusten zutela gaiak ondo bereiztea. "Hezkuntza eta euskara egon izan dira batera (...) Bada euskaragatik joaten zen jendea joateari utzi egin diona batzordean hezkuntzarekin lotutako gauza pila lantzen zirelako".
Batzordeak hileko bigarren astean egingo dira. Baserritarren batzordea eta ingurumenarena dira salbuespena: hileko lehen astelehenean egingo dituzte. Osoko bilkurak, orain arte moduan, hileko azken martitzenean izango dira, 19:00etan. Guztiak parte hartze irekiarekin.
Agintaldiko ordainsariak
Udal gobernu berriak ez du ordainsarietan aldaketarik aurreikusten. Alkatearen soldata mantendu egingo da: 25.827 euro urtean. Orain arte moduan, talde politiko bakoitzak — bi dira — 40 euro jasoko ditu hilean. Horrekin batera, 30 euro zinegotziko eta 25 euro osoko bilkura bakoitzeko. Batzorde-buruko 35 euro hileko. Salbuespena da alkatea batzorde-buru den kasuetan. horrelakoetan, aurreko agintaldian moduan, taldeak ez du ordainsaririk jasoko.