Bizikleta lasterketa zegoen iragarrita aurtengo Torrealdea auzoko jaietan, eta 10 urtetik beherako hamabost bat neska-mutiko agertu ziren atzo puntual. Auzoan gertatutako zirkuituari hiru itzuli eman eta aldapan gora amaitzen zen lasterketa. Txalo artean Urko Lozanok gurutzatu zuen helmuga lehenengo.
Hurrengoa abilezia proba izan zen. Hainbat sari zintzilik eta makila handi bat. Egitekoa, bizikleta gainean gerturatu eta makila eraztunean sartuta oparia lurrera botatzea. Polita izan zen proba. Ikustekoa.
Amaitutakoan Zezena, Lehoia eta Txintxon buruhandiak izan ziren protagonista.
Musika eta afaria
Amaia Txintxurretaren DJ saioak hartu zuen lekukoa 19:00etan. Gustura egin zuten dantza neska-mutikoek. Goikoetxe harategiak emandako afaria ere ondo sartu zitzaien mahaiaren bueltan elkartutako 40 bat lagunei. Festak Gauardi taldearen erromeriarekin luzatu zuten auzotarrek.