Talde biek jakitera eman dutenez astelehenean elkartu ziren. "Bi taldeon programan puntu komun batzuk genituenez horiek identifikatu, lehentasunak markatu eta hurrengo lau urteotan egin beharrekoak zehaztea adostu genuen", adierazi du EH Bilduko Iraitz Lazkanok. "Datorren astean berriz elkartuko gara, eta gai hauetaz zehaztasun gehiagorekin hitz egingo dugu", gaineratu du.
Lazkanok argitu du EH Bilduren asmoa dela gobernu batzorderik ez osatzea, eta erabakiak gainerako batzordeetan hartzea. Batzordeak sinplifikatu egin nahi dituzte gaika, eta helburua da herritarrek batzorde horietan parte hartzea eta erabakiak hartzea. "Gu Geu-koei proposamen hau transmititu genien, baita batzorde batzuen koordinazioa burutu nahi duten galdetu ere. (...) Lanerako gogotsu ikusten ditugu, eta begi onez ikusiko genuke hori horrela izatea".
Elgetako EH Bildutik eskerrak eman dituzte. "Elgetako historian bozka kopuru handiena lortu duen bigarren zerrenda-taldea gara, konfiantza maila hau eskertzekoa da benetan. Emaitza hau ongi eginiko lanaren ondorioa dela uste dugu. Eskerrak, bidenabar, azken hilabete eta urteetan guzti hau posible egiteko lanean aritu direnei".
