Ekitaldian, eguerdi parteko mokadutxoa egiteko aukera eskaini diete hala gura izan duten herritarrei, eta hautagaiek plataformaren triptikoak eta boto-txartelak banatu dituzte. Herritarren ekarpenak jasotzeko kutxa bat ere jarri dute.
Gu Geu Elgetaren alkategai Nerea Villak azaldu duenez, gura dutena da jendeak siglak alde batera utzi eta herrian zentratzea: "Herritarrak etorri daitezela gugana, eta gu saiatuko gara herri berri bat sortzen, parte-hartze handikoa, auzolana-eta horrelakoak bultzatuz. Azken finean, udaletxetik herri zabal bat izaten".
Gaineratu du maiatzaren 24an hauteskundeak irabaztea espero dutela, eta azpimarratu du plataforma plurala dela: "Gure alderdian ezker abertzaletik eskuin abertzalerainoko jendea dago. Independente mordoa gara, eta benetan Elgeta plurala gura duenak, hemen gaituzue. Gu gara Elgeta plurala, ikuspuntu guztiak errespetatuko dituena; besteekin, jakina da zer dagoen".
