Gaur astebete egin zuen Elgetako EH Bilduk jendaurreko aurkezpena herriko plazan. Asteon, hauteskunde programako ildo nagusiak jasotzen dituen esku-orria banatu dute etxez etxe. "Bertan, gure programan jasotzen diren lau ideia garrantzitsu azaltzen dira", adierazi dute.
Lau ideia horiek dira: parte hartze ordenantza egitea, memoria historikoaren euskal interpretazio zentroa indartzea, enplegu plana garatzea eta kantxa konpontzea.
Esku-orriak, bestalde, zerrendako lehenengo bi hautagaien hitzak eta EH Bilduren Elgetako hautagaitza babesten duten bi herritarren hitzak jasotzen ditu. Herritar horiek dira Gema Izagirre eta Iñaki Urgoitia.
Alkategaia Goiena telebistan
Elgetako EH Bilduko alkategai Iraitz Lazkano Goiena telebistaren Debagoieneko alkategaiak izeneko saioan izango da eguaztenean, hilak 20, 21:30ean. Saio horretan programaren lan ildo nagusiak aurkeztuko ditu.
Ekitaldia, hilaren 22an
Elgetako EH Bilduk maiatzaren 22rako iragarri du hauteskunde kanpainako azken ekitaldia. Herriko plazan egingo dute, 20:00etan.