Zortzi orriko aldizkaria banatu du etxez etxe EH Bildu Elgeta koalizioak. Horrela eman du ezagutzera maiatzaren 24ko udal hauteskundeetara aurkeztuko duen programaren ildo nagusiak. "Herritarrekin batera egin eta batzar irekian aho batez onartutako programaren ildo nagusiak jasotzen dituen aldizkaria" dela nabarmendu dute. Programaren buruz, berriz, esan dute: "Elgeta elgetarrekin elkarlanean aldatzea helburu duen programa: herritik, herritarrekin eta herrirako gardentasun osoz".
Bederatzi alor
Bederatzi alor edo ataletan aurkezten du programa EH Bildu Elgetak. Atal horiek dira: parte hartzea, turismoa, sozioekonomia, euskara, kultura, hezkuntza, kirola, ingurumena, eta gizarte politikak. "Bizirik eta zabalik jarraituko duen programa bat izanik, herritarren iritziak entzuten eta jasotzen jarraitzea da gure asmoa", azpimarratu dute.
Zerrendako kideak
Aldizkariak EH Bildu Elgeta hautagaitza osatzen duten hamabi lagunen argazkiak, izen-abizenak, adina, eta ikasketak edo lanbidea ere jasotzen ditu.
