Udalbatzak aho batez adostu du Joaquin Gastesiren artxiboa digitalizatzeko prozesua martxan jartzea. "Asmoa litzateke Gastesiren artxiboarekin hasi eta hiru fasetan Elgetako argazki artxiboa osatzea", esan du Oxel Erostarbe alkateak.
Uste dute 4.500 bat argazki izango dituela Gastesiren artxiboak. Udalak gertu ditu ehun bat, eta Elgeta.org atarian egongo dira ikusgai gutxi barru.
Josetxo Arantzabalen esku dago, gaur egun, Gastesiren artxiboa. Hala, hitzarmen bat sinatuko du Udalak Arantzabalekin. Digitalizazio prozesua egiteko 3.500 euroko diru lerroa du Udalak aurreikusita 2015eko aurrekontuan.
Gastesiren artxiboa berritu ostean asmoa da Goibekokale aldizkarirako ateratako argazkiak digitalizatzea. Prozesuaren hirugarren fasean, herritarrek aukera izango dute etxean dituzten argazkiak Elgetako argazki artxibora gehitzeko.
Elgetako argazki artxiboa hemen.
