Aurrera doa Elgetako liburutegiak apirilerako antolatutako egitaraua. Aste honi dagokionean, eguenean, hilak 23, plazara aterako ditu liburuak liburutegiko arduradun Geaxi Ezpeletak. Mahaia ipiniko du plazan, eta aurreratu duenez liburuak zozketatuko ditu gerturatzen diren herritarren artean.
Barikuan, ikuskizuna
Zirkua, akrobaziak, malabareak eta nola ez... liburuak! Horrela aurkeztu dute Deboteenbote konpainiako lagunek barikuan Elgetan egingo duten Vademekun ikuskizuna. Udal pilotalekuan egingo dute, 18:30ean. Publiko guztiendako da eta doan.
Ezetz igarri lehiaketa
Eta gogoratu apirileko ekintzen barruan martxan dela Ezetz Igarri liburua lehiaketa. Astelehenean emango dituzte jakitera azken pistak eta jokoan den e-reader gailua irabazi gura dutenek apirilaren 30a izango dute azken eguna eskatzen dituzten bi liburuen tituluak emateko. Lehiaketa hamabi urtetik gorako Elgetako liburutegiko bazkideendako da. Argibideak eta orain arteko pistak hemen.