Hastear da neska-mutikoendako euskal dantzen ikastaroa. Hirugarren urtez egingo dute, eta Irati Kortabitarte eta Xabat Leanizbarrutia izango dira arduradun nagusiak.
Etzi, eguaztena, egingo dute ikasturte honetako lehenengo saioa. Antolatzaileek jakitera eman dutenez, aurten ere, bi talde egingo dituzte. Lehenengoan egongo dira 2006tik 2010era bitartean jaiotako neska-mutikoak, eta bigarrenean 1999etik 2005era bitartean jaiotakoak. Lehenengo taldean hamasei daude oraingoz izena emanda, eta bigarrenean hamalau.
Saio guztiak kiroldegiko gimnasioan egingo dituzte, eta eguaztenetan. Txikien taldearen ikastaroa 18:30etik 19:15era bitartean izango da, eta gaztetxoena 19:15etik 20:00etara. Euskal dantzak ikasiko dituzte. Ikasitakoa Ferixa Nagusiko jaietako Herri Eguneko dantza saioan erakutsiko dute.