Eskolako ortuaren goiko aldean hamabi sagarrondo daude gaur eguerditik. Elkarrekin landatu dituzte herriko erretiratu talde batek eta Herri Eskolako neska-mutikoek.
Elkarrekin ikasten izeneko programaren barruan Elgetan egiten den lehen ekintza da. Programa hori Elgetan, Antzuolan eta Bergaran dago martxan, eta helburua da nagusiek eta ikasleek zenbait ekintza batera egitea jakintza partekatzeko.
Oinetako egokiak jantzi, aitzurrak hartu eta landaketak egiteko gertu ziren ikasleak eta nagusiak eguerdi partean. Eguraldiak tartetxo bat eman die landaketak euririk gabe egiteko, eta laster bete dituzte udal brigadako langileek gertatutako zuloak. Xalbadorpe erretiratuen elkarteko kideek azaldu diete ikasleei landaketa zelan egiten den, eta batez ere aitzurra nola erabiltzen den.
Ekintza gehiago laster
Herriko nagusiek eta ikasleek ekintza gehiago egingo dituzte aurrerantzean. Ordenagailua erabiltzeko ikastaroa egingo dute elkarrekin, besteak beste. Interesatuek zabalik dute izena emateko epea.
