Ekimen interesgarria abiaraziko dute gutxi barru Elgetako Herri Eskolak eta Xalbadorpe erretiratuen elkarteak. Miguel Altuna Institutuaren eta Gipuzkoako Foru Aldundiaren Ikasmina programaren bitartez ezagutzak elkarbanatzeko ikastaroak antolatuko dituzte elkarlanean.
Lehenengo ikastaroaren helburua da Herri Eskolako neska-mutikoek aitaita-amamak ordenagailuaren erabileran trebatzea. Zabalik da ikastaroan izena emateko epea, eta landuko dituzten gaien artean daude argazki digitalak ordenagailura pasatzea edo whatsApp aplikazioa erabiltzen ikastea.
Ikastaroa Herri Eskolako ikasleek eta eskolara etorriko den aditu batek gidatuko dute.
Ikastaroan parte hartu gura duten erretiratuek edo bestelako herritarrek eskolako zuzendaritzara edo erretiratuen elkarteko Pedro Mari Uberarengana edo Manu Sarasuarengana jo behar dute lehenbailehen.
