Elgetako alderdi jeltzaleak erabaki du maiatzeko udal hauteskundeetara ez aurkeztea. Patxi Basaurik aurretik jakinarazi zuen ez zela berriz hautagai izango, eta herri batzarrak astelehenean hartu zuen behin betiko erabakia.
"Udal hauteskundeei begira positiboki baloratzen dugu ideia guztietako herritarren iritziak jasoko dituen zerrenda osatzea", esan dute jeltzaleek. "Zerrenda berriaren independentzia errespetatuta saiatuko gara bertan proposamenak egiten. Barikuan izango da plataforma berriaren aurkezpena, eta elgetarrak bileran parte hartzera animatu gura ditugu", esan dute.
EAJ-k, bestalde, positiboki baloratzen du lau urteotan udal gobernuarekin batera egindako lana, eta garrantzitsua deritzo lan ildo horri jarraipena ematea.
