Ignaziotar lurraldearen proiektua hiru tenplutan oinarritzen da –Arantzazu, Loiola eta Antio–. Urtean behin, baina, ezkutuan dauden XVI. mendeko beste altxor batzuk ezagutzeko bisita gidatuak egiten dituzte.
Santiagoren erretaula
Garai horretakoa da, hain zuzen, Elgetako parrokian dagoen Santiago apostoluaren erretaula, eta horixe erakustea izan da bisitaren ardatza. Pieza berezia dela esan du gidariak eta Gipuzkoa mailan influentzia italiar handiena duen erretaula dela azaldu.
Erretaularen gaineko xehetasunak ezagutzeaz gain, parrokia guztia bisitatzeko aukera izan dute animatutakoek. Izan ere, gauza interesgarri asko dituela zihoen gidariak: aldare nagusia, sakristiako obrak, koruan dagoen organoa... Organista bera ere bertan zegoen eta pare bat pieza jo ditu, bisitarien gozamenerako.