Bihar, abenduak 3, Euskararen Nazioarteko Eguna da eta Elgetan ere hainbat ekintza antolatu dituzte euskara aldarrikatzeko.
Herri Eskolan egun berezia izango da eta goizean goizetik hasiko dira Euskararen Eguneko ekintzekin. Gainerako herritarrek 16:00etan dute hitzordua herriko plazan —eguraldi txarrarekin, frontoian—.
Aurreko astetik ari dira ikasleak, irakasleak eta gurasoak Guk euskaraz eta Euskal Herrian euskaraz kantuak prestatzen. Abestu eta dantzatu egingo dituzte, bihar, 16:00etan. Ondoren, umeendako jolasak egingo ditu guraso elkartean, eta 17:00etarako txokolate-jana iragarri dute.
Ondoren, argazki erraldoia atera gura dute herritarren laguntzarekin. Euskal Herriko mapa irudikatu nahi dute. Mapa lurrean margotuko dute, eta herritarrak gainean kokatuz osatuko dute irudi erraldoia. Herritar bakoitzak Euskarak 365 egun dioen kartela erakutsiko du. Ekintza honetan parte hartzera gonbidatu dituzte herriko gainerako eragileak.
