Bihotz taupadak azkartu egingo dira gaur, barikua, Elgetako liburutegian. Baliteke ikarazko oihuak ere entzutea behin baino gehiagotan. Kontua da beldurrezko bi ipuin saioa egingo dituztela. Bederatzi urtetik gorako neska-mutikoendakoa, 19:00etan izango da, eta helduendako saioa 22:00etan hasiko da.
Bereziki apainduko dute liburutegia, eta umeendako saioa 19:00etan hasiko da. Herriko boluntario talde baten eskutik etorriko da umeendako saioa, eta izena ere ipini diote: Dardartien kluba.
Helduendako saioa 16 urtetik gorakoendako iragarri dute, eta Elorrioko boluntario Roman Marzanak egingo du, 22:00etan, gazteleraz. Morir... ¿y luego? da saioaren izenburua.
Umeendako sormen tailerra, hilaren 28an
Hurrengo barikuan, hilaren 28an, Kexak uxatzen izeneko tailerra antolatu dute liburutegitik. Ipuin kontaketa eta sormen lantegia egingo dituzte sei urtetik gorako neska-mutikoendako. Apika taldeak gidatuko du, 17:00etatik 18:00etara. Plaza mugatuak dira, 25 zehatz esanda, eta astelehenean zabaldu zuten izena emateko epea.
Ezetz igarri! lehiaketa martxan
Martxan da, bestalde, 12-16 urte bitarteko Elgetako gaztetxoei zuzendutako Ezetz igarri! lehiaketa. Bi idazleren izenak asmatu behar dira, eta pistak ematen dituzte astelehenero liburutegitik. Irabazlearendako saria ere badago: e-reader bat. Adi ze astelehenean emango dituzte edizio honetako azken pistak.