Turismo sailetik jakitera eman dutenez ate joka dugu Elgetako VII. Pintxo lehiaketa. "Printzipioz herriko sei ostalariek agertu dute lehiaketan parte hartzeko asmoa", adierazi du Turismo saileko arduradun Patxi Basaurik. Hala, azaroko bigarren domekan, azaroaren 9an, egingo dute lehenengo jardunaldia.
Txapelketa ofiziala, azaroaren 9an
Tabernari bakoitzak bi pintxo aurkeztu beharko ditu 12:30erako, eta epaimahai ofizialak dastatu eta baloratuko ditu. Jainaga eta Narbaiza trikitilariak herriko kaleak musikaz alaitzen ibiliko dira eta sari banaketa 14:00etan egingo dute. Egun berean, ostalariek euro baten truke eskainiko dituzte pintxoak bezeroei.
Herritarren saria
Hurrengo bi domeketan —azaroaren 16an eta 23an— botoa emateko aukera izango dute bezeroek Publikoaren saria erabakitzeko. Pintxoak, bi domeketan, euro baten truke eskainiko dituzte ostalariek.
Aurten ere, pintxoen osagaiak asmatzeko erronka luzatuko zaie bezeroei. Parte hartzen dutenen artean bi lagunendako afaria zozketatuko da.