Ferixa Nagusixa Elgetan

Hesian, Oihan Vega, Egan, Zero Xiette... musika eskaintza zabala jaietan

Larraitz Zeberio Lekuona 2014ko eka. 28a, 09:41
Hesian taldea Elgetan izango da bariku gauean

Elgetako festetako aurtengo egitarauak askotariko estiloak bildu ditu eta gustu zein adin guztietarako eskaintza prestatu dute antolatzaileek.

Zapatukoa izango da egunik beteena, Herri Egunean goizean goizetik kuadrillak kalera irtengo baitira. Hala ere, barikuak ere egitarau indartsua izango du, erromeriaren doinu tradizionalak DJ festarekin nahastuko baitira Oihan Vegaren saioan. Ondoren, Hesian talde sakandarraren rock eta ska doinu biziak izango dira plazan. Egunean zehar, trikitilariak eta txaranga ibiliko dira kaleetan, festak girotzen.

Erromeria nagusi

Oinak urratu arte dantza egiteko aukera izango dute elgetarrek festa guztietan zehar. Izan ere, eguenean hasita, erromeria izango da egunero.

Bi taldek eskainiko dute emanaldia eguenean: Gozo gozok herriko plazan eta Zero Xiette taldeak gaztetxean. Barikuan, Gardokiren erromeriak alaituko du jubilatuen bazkalostea.

Zapatu arratsaldean, Jainaga eta Narbaizak joko dute eta dagoeneko Elgetako festetako klasiko bihurtu den Egan taldea ere izango da, arratsaldeko zortzietan hasita.

Gaztetxeko eskaintza

Gaztetxean ere musika proposamen interesgarriak izango dira aurtengoan. Besteak beste, zapaturako Ska Reggae Gaua antolatu dute eta domekan kontzertu akustikoarekin emango diete amaiera festei, txitxi-burruntzia dastatzen duten bitartean.

ALBISTEAK ESKUKO TELEFONOAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.

ASTEBURUETAKO BULETINA

Zure posta elektronikoan asteburuko albiste nabarmenekin osatutako mezua jasoko duzu. Harpidetu zaitez debalde hemen.


Harpidetza aukera guztiak