Iaz bete ziren ehun urte Pasiotarren ordenak Peruko misioak zabaldu zituenetik, eta zeregin horretan zerikusi handia izan zuen Goimendi auzoko Azula baserriko seme Martin Elortzak.
Elortza (Elgeta, 1899) hamaika urterekin sartu zen Gabiriako Kolegio Apostoliko zaharrean, eta 1924 egin zen apaiz. Langile burutsu eta nekagaitzatzat jotzen dute Pasiotarren ordenean, eta paper garrantzitsua aitortzen diote erlijiosoen ikasketa-sistema berritzeko ahaleginean. Seminarioko lehen euskara irakaslea izan zen, eta ikasle guztiak behartu zituen euskara ikastera. 1954ko otsailaren 24an gotzain izendatu zuten, Perun. 1966an hil zen, Liman. Gaur egun zabalik da haren beatifikaziorako prozesua.
Omenaldia ekainaren 8an
Ekaineko bigarren domekarako hainbat ekitaldi iragarri dituzte Elgetan Martin Elortzaren omenez. Meza nagusia, 12:00etan; omenaldi ekitaldia Andra Mari plazan dagoen monumentuaren aurrean, 13:00etan; argazki erakusketa, 13:30ean; eta lagunarteko bazkaria kiroldegian, 14:30ean. Bazkarirako txartelak salgai daude hamabost euroko prezioan.
