Martxotik wi-fi gune librea da Elgetako herriko plaza, baina lehenengo pausoa izan zen hori. Udal ordezkariek adierazi dutenez helburua, orain, herrian Internet zerbitzu merkea eta librea zabaltzea da.
Ideia da, oinarrian, Internet konexio bakarra kontratatzea, eta herritar guztiekin partekatzea. "Kostata baina sare guztia martxan da", esan du Oxel Erostarbe alkateak. "Saltoa, orain, sare hori herriko eraikinetara zabaltzea da, eta erronka da proiektua behar den moduan garatzea".
Batzarra herritarrekin
Udalak bilera antolatu du herritarrak informatzeko. Eguaztenean, hilak 14, egingo dute udaletxeko osoko bilkuren aretoan, 19:00etan. Guifi.net egitasmoko Iker eta Asier Garaialdek emango dituzte azalpenak eta zalantzak argitzeko galderak zuzenean egiteko aukera izango dute herritarrek. Sarea zer den, ze filosofiarekin garatu duten, nola funtzionatzen duen, etxeetara zabaltzeko prozesuak zelakoa behar duen... "Proiektu honek ate asko zabaltzen dizkigu", esan du Erostarbek. "Internet konexio bizkorragoa, hainbat gauza elkarbanatzeko gure arteko sare bat sortzea, konpainien gehiegizko tarifak saihestea... Bost bat euroko hileko kuotarekin etxean Internet edukitzeko aukera izan dezakegu".