Bularreko minbizia da emakumezkoen artean heriotza gehien eragiten dituen gaixotasunetako bat. Gaitza lehenbailehen detektatzeak berebiziko garrantzia du gaixotasuna gainditzeko, eta elgetarrak horren inguruan sentsibilizatzeko hitzaldia egingo du martitzenean Arrate Plazaola sendagileak.
Plazaola Donostiako Onkologikoko sendagilea da, eta, Kattalin elkartearen eskutik udaletxeko osoko bilkuren aretoan izango da martitzenean, hilaren 18an, 18:00etan. Bularreko minbiziaren prebentzioa, tratamendua eta nork bere etxean egin ditzakeen auto-esplorazio teknikak izango ditu hizpide. Saio irekia da; hala ere, Udalak 50 eta 69 urte bitarteko herriko 129 emakumezko gonbidatu ditu hitzaldira eskutitz pertsonalizatu bidez.