Talde gutxiago lehiatu da aurten herri mailako futbito txapelketan, baina azken aste bukaeretako hitzorduek ikusmina piztu dute. Ligaxkako sei jardunaldiak jokatu ostean argitu da zeintzuk diren finalerdietarako sailkatu diren taldeak. Gizonezkoen txapelketan aurrez aurre izango dira Astuan Villa eta La Kokotxa. Beste finalerdia Txapela eta Jaitxo taldeek jokatuko dute.
Nesken txapelketan hiru taldek hartu dute parte, eta iazko txapeldunak gelditu dira aurten finalerdietatik kanpo: Bandoleira taldea, hain zuzen ere. Hala, Etxaon —lehen sailkatua— eta Gaztiak taldeek jokatuko dute finalerdia.
Goleatzaileak
Adin eta maila guztietako jokalariek hartu dute parte, aurten ere, txapelketan. Jendea erakarri dute futbito txapelketako norgehiagokek, eta giro polita sortu da frontoian. Epaile lanak, aurten ere, txandaka egin dituzte talde ezberdinetako ordezkariek eta zeregin horretan ondo aritzea da zalantzarik gabe txapelketako erronketako bat.
Goleatzaile onenen sailkapenak ere egin dituzte aurten. Emakumezkoetan Maitena Mañarikuak —Bandoleira— egin ditu gol gehien; 8 gol. Gizonezkoetan, berriz, Haritz Gallastegi —Txapela— da ligaxkako pitxitxia 16 gol eginda.
