Zortzi irteera aurreikusten dituzte Elgetako Kantsatzeke mendi taldean 2014rako. Bestela esanda, hilean bat abuztua, azaroa eta abendua kanpoan utzita. Guztiak zapatuarekin edo domekarekin egingo dituzte eta parte hartzea irekia da.
Gipuzkoan lau irteera egitea aurreikusten dute: apirilaren 26an Bidegoian-Ernio-Bidegoian; ekainaren 22an Arantzazu-Arbelaitz-Arantzazu; uztailaren 19an Zarautz-Pagoeta-Orio; eta urriaren 25ean Legazpi-Gorosti-Arrola-Legazpi.
Bi txango aurreikusten dituzte Kantsatzeketik Nafarroara: Goizueta-Arriurdigain-Goizueta martxoaren 23an, eta Azkarate-Balerdi-Azkarate irailaren 21ean.
Errioxara ere egingo dute txangoa aurten. Maiatzaren 24an Lagran-Palomares-Lagran irteera egingo dute.
Baina urteko lehenengo hitzordua Bizkaiarekin izango da. Otsailaren 23an Oiz aldera egiteko proposamena luzatu dute mendi taldetik. Ibilbideak Garain izango ditu irteera eta helmuga.
Irteera irekiak
Interesa dutenek kantsatzeke@gmail.com helbide elektronikoan jasoko dituzte argibide gehiago. Kontuan izan urtean zehar egon daitezkeela azken orduko aldaketak egutegian.