Badira urte batzuk Ostiada Oi! taldeak emanaldirik egiten ez duela, eta ikusmina sortu du zapatuan, hilak 21, laukoteak Elgetako gaztetxean egingo duen kontzertuak.
Josu Azkaratek, Iker Vallek, Aritz Macarrok eta Aniotz Virumbralesek osatzen dute Ostiada Oi! taldea, eta 22:30ean hasiko da zapatuko kontzertua. Kontzertuan beste bi talde ere izango dira: Jonny Gerriwelt eta B.C. Bombs.
Betiko kantak
Iker Vallek aditzera eman duenez orain lauzpabost hilabete hasi ziren entseatzen, eta "betiko kantak" joko dituzte zapatuan. Gogoan du Vallek emandako lehen urratsak: "14-15 urte inguru izango genituen. 16 urterekin lokala hartu genuen, eta sasoi horretan hasiko ginen lehenengo kontzertuekin".
Orain bizpahiru urte laga zioten elkartzeari Ostiada Oi! taldekoek. "Egia esan, ez genuen agurreko kontzerturik egin. Azken emanaldia egin genuen, eta laga egin genuen. Aniotz Virumbralesek agurreko kontzertuak egiteko proposamena bota zuen, eta azkenean, laurok animatu gara", esan du Iker Valle elgetarrak.
