Gabriel Aresti Kultur Elkarteak eta Zenbat Gara elkarteak bultzatuta, idazle eta poeta zen Gabriel Arestiren gaineko ikuskizuna egingo dute Elgetako Espaloia kafe antzokian barikuan, 22:30ean.
Bilbotarra bera eta haren lana eguneratzeko helburu izango du ikuskizunak. Belaunaldi batzuentzat bilbotarra gogora ekartzea izango da; beste batzuentzat, aldiz, deskubrimendua. Bada, ikuskizunak poesia, bertsoak, musika, irudia eta antzerkia batuko ditu agertokian. Arestiren oparotasunak, aktibismoak, eztabaidarako zuen joerak isla izango dute lan horretan eta hainbat kultura adierazpide elkartuko ditu oholtza gainean: bertsolaritza, musika, ikus-entzunezkoak, deklamazioa…
Ardatz nagusiak
Aresti poliedrikoena azalduko dute obraren sortzaileek. Idazlearen haurtzaroa, euskara ikasteko erabakia hartu zuen unea, justizia sozialarekiko zuen kezka, obra literarioa, hainbat pertsonarekiko gutun-hizketa, euskara batuaren sorrera eta haren ideologia izango dira ardatz nagusi.
Bilboko Arriaga antzokian egin zen estreinaldiak izandako kritika arrakastatsuaren ondoren, gurera etorriko dira; Elgetako Espaloira, zehazki. Hainbat pertsona ezagun izango dira emanaldia egiten: Ainhoa Alberdi eta Iraia Elias aktoreak; Rafa Rueda gitarra, mandolina, ukelele eta banjoarekin; Iban Urizar tronpeta eta kornetarekin; eta Naia Membrillera perkusioarekin. Haiez gain, Andoni Egaña bertsolaria, Oier Guillan deklamatzailea eta Alain Urrutia ikus-entzunezkoen sortzailea ere bertan izango dira.
Sarrerak salgai
Sarrerak salgai daude dagoeneko Espaloian bertan. Kafe antzokira joanda edo erreserba eginda eros daitezke, 943 78 90 85 telefono zenbakira dei eginda. Sarreren prezioa 12 euro da eta bazkideendako, berriz, 8 euro.