Urtarrilaren 1etik aurrera aplikatuko da ur kontsumoari dagokion fakturazio sistema berria Elgetan. Aldaketa horren aldeko botoa eman zuten azaroko osoko bilkuran udalbatzako ordezkari politiko guztiek. Hala, Gipuzkoako Ur Kontsortzioak, aurrerantzean, kontsumo-tarteak ez ezik etxebizitza bakoitzean erroldatuta dagoen pertsona kopurua ere kontuan hartuko du faktura egiterakoan. Esan beharra dago sistema berriak hiru kontsumo-tarte izango dituela aurrerantzean ere.
Aldaketa esanguratsuenetako bat inor erroldatuta ez dagoen etxebizitzetan gertatuko da. Kasu horietan, aplikatuko den prezioa kontsumo-tarte handienari dagokiona izango da, eta fakturaren igoera %14,6ra irits daiteke.
Gainontzekoendako bi adibide ematen ditu Kontsortzioak.Pertsona bakarra erroldatuta dagoen etxebizitza batean ur kontsumoa 25 metro kubikokoa bada, faktura %4,2 garestituko da. Aldiz, sei pertsona badaude erroldatuta eta kontsumoa 60 metro kubikokoa bada, faktura %4 merkatuko da.