Elgetako Herri Eskolako ikasle eta irakasleek lehiaketa deitu dute Euskararen Egunaren inguruan leloa aukeratzeko. Familiak gonbidatuta daude nork bere ekarpena egiteko, eta eskolako atarian ipini duten kutxa batera bota behar dira proposamen guztiak. Gaur, Euskararen Eguna, aukeratuko dute onena eskolan.
Arratsaldeko egitaraua
Euskararen Eguneko ospakizunek arratsaldean izango dute jarraipena herrian. 16:00etan, euskarazko liburuen erakusketa ipiniko du plazan udal liburuzainak. 16:30ean, ludotekako eta gaztelekuko dinamizatzaileek haurrendako jolasak gidatuko dituzte, eta 17:30ean txokolate beroa banatuko du Maala guraso elkarteak. 18:00etan, Euskara mundura izeneko ekintza egingo du Udalak Domingo Iturbeko plaza berrian. Asmoa da koloretako globoak askatzea.