Zapatua, 12:00ak baino minutu batzuk lehenago heldu zen autobusa Elgetara eta, udaletxera igo aurretik, talde argazkia egin eta aurreskua dantzatu zieten arraunlari zein zaleei. Ondoren, udaletxeko osoko bilkuren aretoan, Mikel Orbañanos arraunlari oriotarrak esker hitzak izan zituen elgetarrentzat, urte guzti hauetan taldearen ondoan egotearren, eta oroigarri polit bat eman zien zaleei: Kontxako banderaren erreplika antzeko koadro bat.
Oxel Erostarbek ere, Elgetako alkatea, urteroko bisita eskertzeaz gain, oroigarri bana eman zien arraunlariei; eta Jesus Mari Beristainek, bertso bat eskaintzeaz gain, duela egun batzuk hildako Beñat Elzo arraunlari ohiari omenalditxo bat egin nahi izan zion. Udaletxean amaitutakoan Espaloira joan ziren hamaiketakoa eta bazkaria egitera, azken urteotan ohitura bihurtu den mus txapelketa jokatu aurretik.