Ikasturte hasieran inauguratutako frontoi zaharrean egin dute aurten eskolako gaztaina-erre jana Elgetan. Atzo arratsaldean elkartu ziren eskolako umeak, irakasleak eta gurasoak frontoiaren babespean gaztaina erreak jatera.
Maala guraso elkartearen eta ikastetxearen ekimenez hogei kilo gaztaina erre zituzten. 15:00etan elkartu ziren guztiak danbolinaren bueltan; eskolako umeak paperezko kukurutxoak eskuan prest zituztela.
Kantuan eta dantzan
Adinka antolatuta kantuan egin zuten lehenengo umeek. Errekin errekina eta Gaztainak erreko ditugu kantuak abestu zituzten. Ondoren, lerroan ipini eta guraso elkarteko kideen eskutik gaztaina beroak jaso zituzten nork bere kukurutxoan. Gustura jan zituzten umeek, eta baita ekitaldira gerturatu ziren gurasoak eta senitartekoak. Dantzan ere egin zuten zenbait umek. Giro hotza egin arren berotasuna sumatu zen atzo Elgetako frontoi zaharrean.