"Munduko hirukoterik onenak dira bi horiek guretzako, inork ez ditu gainditu. Dela gitarra jotzeko moduagatik, bai eta zuten ahotsengatik ere", eman du aditzera Bastidak. Hori horrela, omenaldi gisa interpretatzen dituzte haien abestiak.
Zazpi hilabeteko bidea
Eibartik datorren hirukotea duela zazpi hilabete elkartu zen aurrenekoz eta astean behin batzen dira entseguetarako. "Oso ondo pasatzen dugu momentu horietan eta baita eman ditugun kontzertuetan ere". Izan ere, hainbat emanaldi eskaini dituzte orain arte Medianochekoek: "Gauza xumeak izan dira, Elgetako da orain arteko eszenatokirik serioena, ziurrenik".
Kantutegi zabala
Bertsioen gaua izanik, ez dira faltako Los Panchos talde mitiko mexikarraren abesti ezagunak. Obsesión, Rayito de Luna, La última copa edo Sin tí kantuak entzun ahal izango dira Elgetako kafe antzokian.
"Baina gainera, Los Tres Reyes taldearen Homenaje a los Panchos, Como un bolero edo Odiame abestiak interpretatuko ditugu, besteak beste".
Kantu asko 1940ko hamarkadakoak direla azaldu du Bastidak: "Ziur ikus-entzuleek ezagutzen dituztela joko ditugun abestietako asko, baina ez dakitela talde horienak direla".