Hiriburu askotan egon ohi diren aisialdi proposamenen alternatiba moduan sortu du David Peñalverrek ska-reggae jaialdia. "Gazteria eta musika beti joan dira eskutik", dio antolatzaileak. Urduri baino gehiago, irrikaz dago Peñalver. Kontzertu antolaketan ibilia da, eta soberan daki zapatuko proposamenak oihartzun oparoa izango duela: "Espaloiaren neurriko jaialdi bat antolatu dugu". Ska eta reggae jaialdia den arren, zapatuan hori baino askoz gehiago entzungo da Elgetako kafe antzokian.
Proposamen anitza
Kaleko Urdanga taldea oi! estiloan sar daitekeen arren, skazaleak izan dira. Dudarik gabe, baina, Smooth Beans Santanderko taldea izango da ikuskizuneko izarra, eta Peñalverrek txantxa gisa egindako Facebook proposamen batetik sortu zen guztia. Hilabete batzuen ostean, taldeak proposamena onartu, eta kartel erakargarria egitea lortu dute. Kontzertura joan nahi dutenek zazpi euro ordaindu beharko dituzte; antzokiko bazkideek, langabeek eta ikasleek, berriz, bost ordaindu beharko dituzte.