Udazkenarekin batera badator perretxiko sasoi oparoena, eta Elgetan II. Jardunaldi Mikologikoak antolatu dituzte. Hala, hurrengo aste bukaerarako hainbat ekintza iragarri dituzte.
Eguenerako, hilak 17, Perretxikoa sukaldean izeneko ikastaroa antolatu dute. Sukaldaritza ikastaroa izango da, eta Maialde landetxeko sukaldari Jesus Mari Kalboetxeagak gidatuko du. Intxorta elkartean egingo dute saioa 19:00etan hasita, eta prezioa sei euro da. Antolatzaileek jakitera eman dutenez plaza kopurua mugatua da. Hala, interesatuek aurrez eman behar dute izena udaletxean.
Irteera perretxikotara
Zapaturako, hilak 19, umeendako eta gurasoendako irteera antolatu du Udalak. Taldea 16:00etan abiatuko da herriko plazatik. Helburua da umeekin batera Elgeta inguruko basoetara osteratxoa egitea. Itzuleran, 18:00ak aldera, ekarritako perretxikoak sailkatuko dituzte.
Perretxiko horiekin eta bestelako herritarrek ekarritakoekin erakusketa egingo dute domeka eguerdian; 11:30etik aurrera egongo da ikusgai herriko plazan.
Pintxoak tabernetan
Eskaintza gastronomikoa ere egongo da aurten Elgetako II. Jardunaldi Mikologikoetan. Bariku eta zapatu iluntzean —19:00etatik aurrera— eta domeka eguerdian perretxikoekin egindako pintxoak eskainiko dituzte herriko tabernariek. Pintxo horiek euro bateko salneurria izango dute taberna guztietan.